काठमाडौँ । आईसीसी क्रिकेट विश्वकप लिग २ को खेलमा नेपालले ओमानसामु जितका लागि २ सय ५७ रनको लक्ष्य प्रस्तुत गरेको छ ।
कीतिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदानमा टस जितेर पहिले ब्याटिङ गरेको नेपालले ४९.५ ओभरमा सबै विकेटको क्षतिमा २ सय ५६ रन बनाएको हो ।
नेपालको सुरुवात भने राम्रो हुन सकेन । दोस्रो ओभरमा नै विनोद भण्डारी खाता नै नखोली पभेलियन फर्किएका थिए ।
त्यसपछि अर्जुन कुमाल र आसिफ शेखले शतकीय साझेदारी गर्दै नेपालको इनिङ्स सम्हाले । शेख शतक बनाउनबाट मात्र ६ रनले चुके । उनले ९७ बलमा ७ चौका र ५ छक्काको मद्दतले ९४ रन बनाए ।
कुमाल पनि अर्धशतक बनाउनबाट थोरैले चुके । उनले ८७ बलमा ४८ रन जोडे । उनले ४ चौका प्रहार गरे ।
दीपेन्द्र सिंह ऐरीले ४२ बलमा ३३ रन जोडे । उनले १ चौका प्रहार गरे । आरिफ शेखले उत्कृष्ट केमियो खेल्दै तीव्र गतिमा ४३ रन बनाए । उनले मात्र २४ बलमा १ चौका र ४ छक्का प्रहार गरे ।
गुल्सन झाले २३ बलमा १७ रन जोडे भने कप्तान रोहित पौडेलले भने १६ बलमा ९ रन मात्र बनाउन सके । करन केसी, नन्दन यादव र सन्दीप लामिछानेले ठुलो योगदान दिन सकेनन् ।
