काठमाडौं । नेपाल प्रिमियर लिग (एनपीएलको) तेस्रो संस्करण सुरु हुन अब मात्र चार दिन बाँकी छ। ‘फेस्टिभल अफ हिमालयज’का रूपमा समेत परिचित यस प्रतियोगिताको तेस्रो संस्करण अक्टोबर २६ देखि नोभेम्बर २१ सम्म काठमाडौंस्थित त्रिवि अन्तर्राष्ट्रिय क्रिकेट रंगशालामा सञ्चालन हुँदैछ।
प्रतियोगिता नजिकिएसँगै नेपाल क्रिकेट संघ (क्यान) ले तयारीलाई तीव्रता दिएको छ। त्रिवि अन्तर्राष्ट्रिय क्रिकेट रंगशालामा मैदान व्यवस्थापन, आवश्यक संरचना निर्माण तथा प्रविधि जडानलगायतका काम व्यापक रूपमा अघि बढाइएको छ। प्रतियोगितालाई व्यवस्थित र भव्य बनाउन आयोजकले तयारीलाई अन्तिम चरणमा पुर्याउने प्रयास गरिरहेको छ।
यता, प्रतियोगितालाई लक्षित गर्दै विज्ञापनदाता तथा प्रायोजक कम्पनीहरूले पनि प्रचारप्रसारलाई तीव्र बनाएका छन्। काठमाडौंका विभिन्न सडक तथा प्रतियोगिता स्थल आसपास कम्पनीहरूका प्रचार सामग्री, कटआउट, स्वागतद्वार र होर्डिङ बोर्ड राखिएका छन्। यसले प्रतियोगिताको माहोललाई थप उत्सवमय बनाएको छ।
अघिल्ला संस्करणको तुलनामा यसपटकको एनपीएल थप रोमाञ्चक हुने अपेक्षा गरिएको छ। नेपाल क्रिकेट संघ (क्यान) ले प्रतियोगितामा डीआरएस प्रविधि प्रयोग गरिने जानकारी दिएसँगै खेलप्रतिको उत्सुकता थप बढेको छ। त्यस्तै, अन्तर्राष्ट्रिय क्रिकेट परिषद् (आईसीसी) ले प्रतियोगितालाई लिस्ट ‘ए’ टी–२० को मान्यता दिएपछि नेपाली क्रिकेटका लागि यो संस्करण थप महत्त्वपूर्ण बनेको छ।
यसपटकको प्रतियोगितामा अन्तर्राष्ट्रिय क्रिकेटका चर्चित खेलाडीहरूको सहभागिताले पनि दर्शकको आकर्षण बढाउने देखिएको छ। विशेषगरी आन्द्रे रसेलजस्ता स्टार खेलाडीको अनुबन्धले नेपाली क्रिकेट समर्थकमा उत्साह थपेको छ।
आधुनिक प्रविधिको प्रयोग, अन्तर्राष्ट्रिय मान्यता र चर्चित खेलाडीहरूको सहभागिताका कारण यसपटकको एनपीएललाई नेपाली क्रिकेटको विकास र अन्तर्राष्ट्रिय पहिचान विस्तारका दृष्टिले समेत महत्त्वपूर्ण रूपमा हेरिएको छ।
अब प्रतियोगिता सुरु हुन केही दिन मात्रै बाँकी रहँदा मैदानको तयारीदेखि प्रचारप्रसारसम्मका गतिविधि तीव्र बनेका छन्। खेल सुरु भएसँगै त्रिवि अन्तर्राष्ट्रिय क्रिकेट रंगशाला क्रिकेटमय बन्ने अपेक्षा गरिएको छ। कुन टोलीले उपाधि जित्ला र कुन खेलाडीले दर्शकको मन जित्ला भन्ने चासो अहिले नै क्रिकेटप्रेमीहरूमा बढ्न थालेको छ।
